భారత్ సమాచార్.నెట్, సంగారెడ్డి: హైదరాబాద్‌లోని గీతం స్కూల్ ఆఫ్ సైన్స్, గణిత శాస్త్ర విభాగం పరిశోధక విద్యార్థి సోమిరెడ్డి శ్రీనివాసరెడ్డి డాక్టరేట్‌కు అర్హత సాధించారు. న్యూటోనియన్ కాని ద్రవాలలో వేడి, ద్రవ్యరాశి బదిలీ ప్రవాహ సమస్యల సంఖ్యా విశ్లేషణపై ఆయన చేసిన అధ్యయనానికి డాక్టరేట్ లభించింది. ఈ పరిశోధనకు డాక్టర్ కె. గోవర్ధన్ మార్గదర్శనం వహించారు.
డాక్టర్ శ్రీనివాసరెడ్డి అధ్యయనం ఇంజనీరింగ్, పారిశ్రామిక ప్రక్రియలలో ముఖ్యమైన అనువర్తనాలను కలిగి ఉన్న న్యూటోనియన్ కాని ద్రవాల సంక్లిష్ట ప్రవర్తనపై విలువైన అంతర్దృష్టులను అందిస్తుందని డాక్టర్ గోవర్ధన్ తెలిపారు. సిద్ధాంత వ్యాసం పీహెచ్‌డీ పట్టాకు అర్హత సాధించిన సందర్భంగా గీతం అదనపు ఉపకులపతి ప్రొఫెసర్ డి.ఎస్. రావు, రెసిడెంట్ డైరెక్టర్ డీవీవీఎస్‌ఆర్‌ వర్మ, స్కూల్ ఆఫ్ సైన్స్ ప్రిన్సిపాల్ డాక్టర్ ఎం. రెజా, ఇతర అధ్యాపకులు, సిబ్బంది శ్రీనివాసరెడ్డిని అభినందించారు.